Upplýsingar

Dagsetning
2016.10.28

Framleiðslueining jáeindaskannans kemur í hús

Framleiðslubúnaður vegna nýs jáeindaskanna á Landspítala var hífður í hús 24. október 2016. Íslensk erfðagreining færir þjóðinni þetta langþráða tæki að gjöf, ásamt jarðhýsi þar sem öllum búnaðinum verður komið fyrir í. Þar verður rannsóknarstofa, gæðaeftirlit og nauðsynleg framleiðsla á ísótópum, geislavirku efni fyrir jáeindaskannann. Kjarninn í þeim búnaði sem kom núna er rafall sem vegur tæp 10 tonn. Utan um hann eru hurðir eða hlífar sem samtals vega vel á fjórða tug tonna, járn- og blýklumpar sem koma í veg fyrir geislun. Alls var núna komið með 60 tonna búnað, jáeindaskanninn sjálfur er væntanlegur fyrir áramót.