Landspítali hefur eignast þessa hluti í sprotafélögum við að leggja frumkvöðlum lið í upphafi einkum í formi aðstöðu, aðgangs að tækjum eða með öðrum hætti en fyrirkomulagið er vel þekkt í vísindasamfélaginu. Í samningnum felst að Nýsköpunarsjóður fer með eignarhlutina og nýtist þar sérþekking sjóðsins á rekstri sprotafélaga.
Samningurinn byggir á sambærilegum samningi við fjármála- og efnahagsráðuneytið sem var gerður árið 2018 þar sem Nýsköpunarsjóði var falin umsýsla með eignarhlutum ríkissjóðs í óskráðum félögum. Árið 2021 var einnig gerður sambærilegur samningur við HVIN (háskóla-, iðnaðar- og nýsköpunarráðuneytið) um eignarhluti í eigu Nýsköpunarmiðstöðvar íslands þegar sú stofnun var lögð niður.
„Það er mikilvægt að hlúa vel að sprotafélögum sem spretta upp innan veggja spítalans og er þessi samningur liður í að skapa trausta og hvetjandi umgjörð fyrir frumkvöðlastarfið“, sagði Runólfur Pálsson, forstjóri Landspítala, við undirritun samningsins.
Hrönn Greipsdóttir, framkvæmdastjóri Nýsköpunarsjóðs atvinnulífsins, fagnar samningnum og telur hann bæði samræmast vel hlutverki og sérþekkingu sjóðsins. „Um leið og það er mikilvægt að halda utan um þau verðmæti sem skapast í því frumkvöðlastarfi sem á sér stað innan spítalans þá ætti reynsla og stuðningur frá Nýsköpunarsjóði að nýtast frumkvöðlunum“.