Fjárveitingum skipt á svið

Rúmlega 20 milljarða króna fjárveitingu til Landspítala - háskólasjúkrahúss fyrir árið 2002 hefur verið skipt á svið og niðurstaðan fengin sviðsstjórum til að vinna úr. Framkvæmdastjórn spítalans og stjórnarnefnd leggja ríka áherslu á að útgjöld sjúkrahússins haldist innan fjárlagarammans á þessu ári og hyggjast fylgja eftir þeim aðhaldsaðgerðum sem hafa verið ákveðnar.

Stjórnendur LSH er á einu máli um að verulegur árangur hafi náðst í rekstri stofnunarinnar árið 2001. Rekstrarkostnaður var þá nær óbreyttur frá árinu áður, þótt sjúklingum hafi fjölgað um 3,5% og umfangsmiklar aðgerðir staðið yfir við sameiningu sérgreina.

Til að útgjöld sjúkrahússins fari ekki fram út heimildum þarf að draga þau saman um 400 milljónir króna á árinu 2002. Vegna þessa var gripið til aðhaldsaðgerða í lok síðasta árs og er samstaða milli yfirstjórnar LSH og sviðsstjóra um að halda þeim áfram. Í aðgerðunum hefur meðal annars falist fækkun starfsmanna og breyting á kjörum margra annarra. Auk þess eru nýráðningar í algjöru lágmarki á spítalanum og lagt kapp á að draga úr yfirvinnu eins og kostur er.

Við skiptingu fjárveitinga til spítalans hefur verið haft að leiðarljósi að í engu verði hvikað frá sameiningu sérgreina sem ákveðin hefur verið. Jafnframt að slysa- og bráðastarfsemi spítalans njóti forgangs og að átak verði gert til að stytta bið eftir aðgerðum.


Fjárheimildir sviða LSH 2002

	millj.kr.
Yfirstjórn	328
Skrifstofa fjárreiðna og upplýsinga	464
Skrifstofa tækni og eigna	3.104
Skrifstofa kennslu, vísinda og þróunar	176
Barnasvið	808*
Kvennasvið	843
Geðsvið	1.958
Lyflækningasvið I	2.493
Lyflækningasvið II	631*
Skurðlækningasvið	1.983
Svæfinga-, gjörgæslu- og skurðstofusvið	2.062
Klínískt þjónustusvið	1.046
Slysa- og bráðasvið	818
Öldrunarsvið	853
Endurhæfingarsvið	894*
Blóðbanki	248
Rannsóknarstofnun LSH	733
S-merkt lyf	1.040
Aðrir liðir og tilfærslur	-200
Samtals	20.282
Fjárlög 2002	20.282

*Leiðréttar tölur frá töflu í Spítalapúlsinum.