Landspítali er á hættustigi
Staðan kl. 12: Þrír sjúklingar eru inniliggjandi á legudeildum með COVID, 705 eru í eftirliti á COVID göngudeild, þar af 74 börn. Enginn er á rauðu en 22 einstaklingar flokkast gulir. 14 starfsmenn eru í einangrun, 30 í sóttkví A og í vinnusóttkví eru 149 starfsmenn.
Sérstakar tilkynningar
1. Reglur um skimun sjúklinga hafa verið uppfærðar. Skima þarf alla sjúklinga sem flytjast á aðra stofnun eða í þjónustu opinberra aðila óháð bólusetningastöðu þeirra. Um skimanir innan spítalans er vísað í gæðaskjal þar um.
2. Frá og með deginum í dag er starfsfólk sem er að snúa til starfa eftir orlof beðið um að skila einu neikvæðu sýni áður en það mætir til starfa.
- Um er að ræða skimsýni sem ætti ekki tefja endurkomu til vinnu en viðkomandi þarf að fylgja leiðbeiningum um sóttkví C þar til sýni hefur verið svarað neikvæðu.
- Best er ef sýnið er tekið 1-2 dögum áður en starfsmaður kemur til starfa. Þetta á við starfsfólk sem er ekki að koma erlendis frá, en um þann hóp gilda sérstakar reglur eins og áður hefur verið kynnt.
- Þessi sýni má taka á starfsstöð viðkomandi en þá þarf að gæta þess að merkja beiðnina með sýninu þannig að aðsetur sé Heilsufarsskoðun starfsmanna og ábyrgur læknir sé Már Kristjánsson.
3. Nýjar reglur um endurkomu bólusettra starfsmanna til vinnu eftir COVID sýkingu og útskrift frá COVID göngudeild hafa tekið gildi. Sækja þarf um sóttkví C fyrir þessa einstaklinga og gildir hún í 7 daga frá útskrift.
4. Vefsíða með fræðsluefni um sýkingavarnir er komin í loftið – allir starfsmenn eru hvattir til að kynna sér efnið sem er á innri vef spítalans.
5. Verið er að kanna möguleika á að styrkja útkallsteymi yfirsetu.
Ástæða er til að útskýra þá litakóðun sem COVID göngudeildin notar til að skilgreina veikindi og tíðni eftirlits með einstaklingum með COVID smit. Það að einstaklingur sé á grænu þýðir ekki sjálfkrafa að hann sé einkennalaus heldur getur hann verið með ýmis einkenni en vegna aldurs, fyrra heilsufars, áhættuþátta o.s.frv. getur hann stigast grænn með litla, meðal, eða mikla áhættu á að þróa frekari veikindi. Á sama hátt eru þeir sem stigast gulir einnig með mismikil einkenni og eftirlit þeirra stýrist af áhættumati og líkum á frekari veikindum. Þeir sem eru rauðir eru með mikil einkenni og eru í mestri áhættu að verða alvarlega veikir og þarfnast innlagnar. Þessi aðferð við að flokka sjúklinga og veita þeim eftirlit við hæfi hefur reynst afar vel á göngudeildinni frá byrjun og er t.d. vegvísir um hvenær skal kalla viðkomandi inn til skoðunar og meðferðar í göngudeild og hversu títt þarf að hringja í hann og meta ástandið. Það gefur því ekki rétta mynd af ástandinu að horfa einungis á fjölda einstaklinga með ákveðna litakóðun heldur eru fleiri breytur sem hjálpa fagfólkinu að skipuleggja eftirlitið og forgangsraða með öryggi sjúklinga að leiðarljósi.