Landspítali er á neyðarstigi
Í dag eru 38 sjúklingar með COVID á Landspítala, þar af eru 26 í einangrun. Á gjörgæslu eru 4, allir í öndunarvél og einn í hjarta- og lungnavél.
Frá föstudegi til sunnudags bættust 9 sjúklingar í COVID hópinn. Á lyflækningadeild B7 er komin upp nokkuð útbreidd hópsýking þar sem alls 6 sjúklingar og 9 starfsmenn hafa greinst á undanförnum dögum. Deildin er lokuð og verða skimanir og smitrakning áfram næstu daga. Á Landakoti eru nú 3 sjúklingar í COVID einangrun og standa vonir til að hægt verði að aflétta af þeim í þessari viku.
Smitsjúkdómadeildin er því sem næst full og lungnadeildin tekur nú bæði COVID sjúklinga, þá sem eru að ná sér af COVID sýkingu (post COVID) og almenna sjúklinga.
Vel hefur gengið að flytja sjúklinga út á land og er mjög mikilvægt að því samstarfi verði haldið áfram á næstu vikum, mánuðum og helst til frambúðar.
Talnaupplýsingar um stöðuna á spítalanum eru birtar á www.landspitali.is.
Sérstakar tilkynningar
1. Reglum um afléttingu einangrunar inniliggjandi sjúklinga hefur verið breytt þannig að nú er almenna reglan sú að tví- og þríbólusettir sem hafa haft einkenni/COVID sjúkdóm sæta 14 daga einangrun sem er aflétt með tveimur neikvæðum PCR prófum eða staðfestum mótefnum (N). Undantekningar frá þessu geta verið nokkrar en þarfnast þá mats farsóttanefndar hverju sinni.
2. „Post COVID“ sjúklinga sem eiga að flytjast á aðra stofnun að lokinni meðferð á Landspítala má aðeins senda að höfðu samráði við farsóttanefnd.
3. Ekki þarf að sækja um sóttkví B1 heldur tilkynna til starfsmannahjúkrunar eftir að yfirmaður hefur farið vandlega yfir gildandi reglur og telur nauðsynlegt að kalla starfsmann í sóttkví inn til starfa. Verið er að vinna að vefformum fyrir sjálfsskráningu í B1 og sóttkví C.