Runólfur Pálsson hefur verið skipaður forstjóri Landspítala til næstu fimm ára. Heilbrigðisráðherra skipaði í starfið að undangengnu mati lögskipaðrar hæfnisnefndar.
Runólfur Pálsson er sérfræðingur í lyflækningum og nýrnalækningum á Landspítala. Hann tók í október 2021 tímabundið við starfi framkvæmdastjóra meðferðarsviðs á Landspítala af Guðlaugu Rakel Guðjónsdóttur meðan hún hefur gegnt starfi forstjóra spítalans.
Runólfur lauk kandídatsprófi í læknisfræði frá Háskóla Íslands árið 1985, sérfræðinámi í lyflækningum frá Hartford Hospital og University of Connecticut árið 1991 og sérfræðinámi í nýrnalækningum frá Massachusetts General Hospital og Harvard Medical School árið 1996. Runólfur hefur starfað á Landspítala samfellt frá árinu 1996 og hefur gegnt þar ýmsum stjórnunarstöðum, síðast starfi forstöðumanns lyflækninga- og bráðaþjónustu áður en hann varð tímabundið framkvæmdastjóri meðferðarsviðs. Hann er jafnframt prófessor við læknadeild Háskóla Íslands og varaforseti deildarinnar.
Runólfur tekur við starfi forstjóra 1. mars 2022.