Í tilefni dagsins framkvæmdu næringarfræðingar Landspítala ásamt nemum í klínískri næringarfræði mat á áhættu á vannæringu hjá inniliggjandi sjúklingum á Landspítala en samkvæmt verklagi skal meta áhættu á vannæringu við innlögn sjúklings.
- Af þeim 406 sem voru skimaðir fyrir áhættu á vannæringu þann 14. nóvember voru 36% með sterkar líkur á vannæringu.
- Niðurstöður eru í samræmi við niðurstöður annarra landa á alþjóðlegum degi næringar
- Niðurstöður eru einnig í samræmi við fyrri rannsóknir á Landspítala þar sem tíðni vannæringar er 20-60%, mismunandi eftir sjúklingahópum.
- Ef sterkar líkur eru á vannæringu skal senda tilvísun á Næringarstofu í Heilsugátt.
- Næringarfræðingar á Landspítala veita næringarmeðferð við vannæringu en vannæring meðal inniliggjandi sjúklinga er oft tengd sjúkdómi og/eða meðferð hans. Vannæring getur haft í för með sér lengri sjúkrahúslegu og meiri kostnað fyrir heilbrigðiskerfið.
Áróra Rós Ingadóttir er deildarstjóri Næringarstofu en þar starfa um 22 næringarfræðingar í um 15 stöðugildum. Næringarfræðingar veita einstaklingsmiða næringarmeðferð til sjúklinga Landspítala, bæði inniliggjandi og á göngudeildum. Starfsmenn Næringarstofu vinna í ýmsum þverfaglegum teymum á Landspítala og veita ráðgjöf til heilbrigðisstarfsmanna Landspítala. Næringarstofa er leiðandi í gerð fræðsluefnis og verklags tengt næringarmeðferð sjúklinga á landsvísu. Öflugt rannsóknarstarf fer fram á Næringarstofu í samstarfi við Háskóla Íslands og taka næringarfræðingar á Landspítala þátt í kennslu í klínískri næringarfræði við Háskóla Íslands ásamt umsjón með starfsnámi nemenda í klínískri næringarfræði á meistarastigi.
Erna Petersen hefur starfað sem næringarfræðingur á Barnaspítalanum undanfarin 6 ár og sinnir bæði bráðveikum inniliggjandi börnum og langtíma eftirfylgd á göngudeild. Mörg þessara barna eru langveik með alvarlega undirliggjandi sjúkdóma og þurfa næringarstuðning í langan tíma á meðan önnur glíma við tilfallandi veikindi og þurfa meðferð til að fyrirbyggja vannæringu. Erna vinnur í náinni samvinnu við aðrar fagstéttir og foreldra sem þurfa oft að leggja á sig mikla vinnu við að næra veikt barn.
Guðlaug Gísladóttir hefur starfað sem næringarfræðingur á taugalækningadeild sl 17 ár og sinnir m.a sjúklingum með parkinson, MND og þá sem hafa fengið heilablóðfall. Þessir hópar eiga það sameiginlegt að geta verið með kyngingarerfiðleika á mismunandi stigum og eiga því oft erfitt með að nærast. Næringarmeðferð er einstaklingsmiðuð fyrir hvern sjúkling. Oft er þörf fyrir næringu um slöngu og fæði með breyttri áferð ásamt orku- og næringarviðbót til þess að uppfylla orku- næringarefnaþörf.
Bjarki Þór Jónasson lauk námi í klínískri næringarfræði í júní síðastliðinn. Hann hefur starfað á ýmsum deildum meðfram náminu en starfar nú á hjartadeild og nýrnadeild. Næringarfræðingar á nýrnadeild veita til dæmis fræðslu til sjúklinga með skerta nýrnastarfsemi og þurfa að takmarka prótein í fæði. Nýrun losa líkamann við niðurbrotsefni próteina og því getur mikil neysla þeirra aukið álag á nýru. Prótein er hins vegar mjög mikilvægt næringarefni og því mikilvægt að skerða ekki neyslu á því umfram það sem nauðsynlegt er.